Hugdettur

Hvað er þetta eiginlega með hann Gísla Martein? Hvers vegna í ósköpunum þarf maðurinn alltaf að æpa á alla sína viðmælendur? Hann hefur margoft fengið til sín hæglætisfólk sem liggur frekar lágt rómur- eða kannski liggur rómur viðmælenda nærri meðalhæð en virðist aðeins lágur vegna hávaðans í Gísla. Hljóðin í drengnum eru verulega þreytandi og venjulega er þátturinn hans stutt á veg kominn þegar ég hreinlega gefst upp á að horfa. Gísli Marteinn virðist aukinheldur sjaldnast ná neinum tengslum við sína viðmælendur, fjarlægðin milli hans sem stjórnanda og gestsins er oft bersýnileg og mér finnst einhvern veginn að honum sé nokkuð sama hvað gestirnir hafa að segja, sé jafnvel áhugalaus um umræðuefnið. Aðalatriðið sé gesturinn sjálfur,þ.e. að hafa þennan og þennan hjá sér,burtséð frá því hvað gesturinn hefur fram að færa. Enn eitt hefur vakið athygli mína. Gestir Gísla Marteins virðast aðallega vera úr tveimur þjóðfélagahópum, fjölmiðlafólk og leikhússfólk. Þættirnir hafa því tilhneigingu til að verða einsleitir, fyrirsjáanlegir og kryddaðir hávaða stjórnandans. Það veldur mér heilabrotum hvers vegna þeir njóta slíkra vinsælda sem kannanir hafa sýnt. Kannski nefnir fólk í slíkum könnunum einungis það sem því kemur fyrst í hug s.b.r. klassíska skoðanakannanaspurningu um vinsælasta og óvinsælasta stjórnmálamanninn. Svarið við hvorutveggja er yfirleitt það sama: "Davíð Oddsson"

Hvern fjandann var skósmiðurinn á Fíatinum að hugsa? Bremsar eins og auli inni í undirgöngunum, í takmörkuðu útsýni, þykist hafa verið að "hita dekkin" ! Í staðinn hefði hann í besta falli uppskorið ónýtt dekk, með flatan platta. Uppskeran var hins vegar ónýtur bíll og fall úr keppni. Reynir svo að kenna Montoya ræflinum um skandalann. Eins og hann hefði átt að vita hvað skóarinn ætlaði að gera næst. Þvílíkur fíflagangur! Þessi aulamistök skrifast aðeins á Schumacher. Ekki þar fyrir, hann hefði svo sem ekki unnið í Mónakó. Var ekki í aðstöðu til að ná Renóinum. Fleiri stjörnur skinu skært. Button sýndi afburðaakstur. Sato líka þar til vélin gaf sig. Framtíðarekill þar. Alonzo var í einhverjum herleiðangri sem ég skil ekki alveg. Veit ekki hvað hann var að reyna að framkvæma þarna inni í göngunum. Kannski hefur skugginn í þeim hvatt menn til myrkraverka. Mér fannst þetta skemmtileg keppni og líklega gefur maður formúlunni aðeins meiri tíma á næstunni. Tímabilið var farið að horfa illa með leiðindasigurgöngu skósmiðsins á rauða Fíatinum. Mercedes er heillum horfinn og því rými fyrir BAR-Honda, Renault, og jafnvel Sauber í toppslagnum við rauðu Fíatana og bláhvítu BMW bílana.

Nú hefur Sýn skotið sig í fótinn. Ég er örugglega ekki einn um að fylgjst með boxi í sjónvarpi. Ég hef fylgst með því hvaða bardagar hafa verið framundan og þar sem ég er ekki áskrifandi að Sýn að staðaldri hef ég keypt áskrift þegar eitthvað spennandi hefur verið í sjónmáli, þá einn og einn mánuð í einu. Þess á milli hef ég getað haldið þræðinum þó í læstri dagskrá sé, því hljóðið hefur verið óruglað og því þokkalega hægt að fylgjast með þó myndin sé brengluð. Nú er hinsvegar nýlega farið að rugla hljóðið einnig sem gerir manni ókleift að fylgjast með því sem fram fer. Með bæði mynd og hljóð brenglað er ómögulegt að fylgjast með. Þar sem ég er ákveðinn í að kaupa ekki fasta áskrift að stöðinni hef ég þegar misst þráðinn í boxinu og reyni ekki lengur að fylgjast með því. Þ.a.l. kaupi ég ekki lengur mánuð og mánuð í áskrift heldur ekkert- alls ekki neitt. Svo með því að koma í veg fyrir að menn geti haldið þræði í læstri dagskrá með ólæstu hljóði missir stöðin þessa notendur að fullu. Ef þetta er ekki að skjóta sig í fótinn, þá veit ég ekki hvað það er.......

Nú er búið að kollvarpa öllu gamla blogg kerfinu, uppfæra síðuna og hún er orðin svo þung að ég þarf að bíða einar tíu mínútur eftir að hún keyri sig upp. Það er ekki á vísan að róa hér frekar en annarsstaðar. Þarf að læra á kerfið og reyna að fá það til að virka.

Eins og Jóhanna Sigurðar forðum. Maður hélt að sumarið væri komið, skellti sér í ferðalag og allez. Síðan sér maður í sjónvarpi sömu slóðir og voru heimsóttar viku áður í sól og fínu veðri. Allt á kafi í snjó (allt á kafi er kannski orðum aukið) en allavega allt grátt, skítakuldi og norðanhraglandi. Þessa dagana er þokkalega bjart en kalt hér syðra, en éljar norðan og vestanlands. Ekki líst oss á ferðalög næstu daga. Lauk í kvöld við að koma fyrir örbylgjuofni í ferðadjásninu og vantar nú fátt til húshaldsins. Er kominn á útkikk eftir þvottavél ,sem ég er orðinn sannfærður um að ætti að vera staðalbúnaður í hverjum húsbíl. Heyrðu annars, Jón. Skálarnar kostuðu 12.200 kall og reikningurinn er 130-26-15755. Kennitala konunnar er 070261-3919. Þetta er betri kennitala en mín því hún er yngri (altsvo konan) Haben sí das rúligheit!