Hugdettur

Það er rigning-og nú stendur fyrir dyrum veiðiferð í Álftá á Mýrum. Heppilegt veður fyrir maðkatínslu,er mér sagt. Er ekki sérlega hrifinn af stangveiði. Kýs heldur stórvirkari veiðarfæri og öruggari veiðislóðir. Handfærarúllu, fimm öngla á slóðann og Djúpkjaftinn Stigahlíðarmegin. Jafnvel allt inn undir Skarfasker má fá þokkalegan fisk. Hef oft sett í boldangsufsa undan Stigahlíð. Góður staður. En nú er báturinn seldur. Grotnar niður við bryggju á Akranesi. Sjálfur fluttur suður. Hér er ekkert Djúp, engir Jökulfirðir. Fiskurinn úr Faxaflóanum varla mannamatur vegna mengunar.
Fyrir vestan var varla litið á ufsa sem mat. "það má haf´ann í bollur" var sagt. Prófaði aldrei ufsabollur. Lét hinsvegar síga í flothjalli úti á Prestabugt. Fullyrði að siginn ufsi er herramannsmatur. Ekki síðri en siginn þorskur. Auk þess engar flugur í flothjalli. Leitaði stundum að ýsublettunum sem áttu að vera út af Hnífsdal. Fann aldrei , svo heitið gæti. Keypti ýsuna í búðum í staðinn.
Stubban mín fer með mér að Álftá. Gríðarlega spennt enda ekki áður farið í veiðiá. Aðeins tæplega átta ára. Eyddum góðum tíma á dögunum við Svínavatn í Húnaþingi. Ekki bein. Reyndum á bryggjum í suðurleiðinni. Hvammstanga, í fjörunni við Borðeyri, í Borgarnesi, á Akranesi. Ekki bein heldur. Fáum vonandi eitthvað um helgina. ---t.

Leiðretting

Birting

Framhald.